As 15 mellores embarcacións galegas competiron esta mañá na enseada do Orzán por este prestixioso torneo con 36 anos de historia na Coruña
A embarcación de Samertolameu na categoría masculina, e a de Cabo na feminina, acadaron o triunfo na triséximo sexta edición da Bandeira Teresa Herrera masculina de traiñeiras e nas sexta edición feminina. Esta mañá celebrouse esta tradicional proba, unha das máis veteranas do calendario deportivo coruñés, na enseada do Orzán.
O evento congregou a milleiros de persoas ao longo do Paseo Marítimo coruñés, tanto nesta xornada como na do sábado, cando se decidiu o título da Liga Galega de Traiñeiras durante a ronda clasificatoria do Teresa Herrera, que foi tamén para estes dous conxuntos, que se levaron a camisola amarela nas categorías masculina e feminina.
Este domingo, a xornada comezou coa tradicional ofrenda á xente do mar. A continuación disputáronse as regatas feminina e masculina, nas que participaron as 5 e as 10 mellores embarcacións do sábado, respectivamente. A competición foi moi emocionante e amosou a gran calidade das augas coruñesas para este tipo de deportes, que xa forman parte da tradición da cidade cada verán.
Travesía a nado de Santo Amaro
Por outra banda, este domingo disputouse tamén a tradicional Travesía a nado á enseada de Santo Amaro. A proba, que celebrou a súa octoxésima primeira edición, contou coa participación de 300 deportistas, que percorreron unha distancia aproximada de 1.200 metros, con saída e chegada na praia situada en Durmideiras. A vitoria foi para Miguel Martínez Novoa na categoría masculina e Lucía Villarnovo Pazos, na feminina.
